Johnson & Johnson wen babapoeier-kankersaak

’n Jurie in Los Angeles in die Verenigde State het ten gunste van die farmaseutiese reus Johnson & Johnson beslis in ’n saak waarin die families van drie vroue aangevoer het dat die maatskappy se talk-gebaseerde babapoeier eierstokkanker veroorsaak het.

Die jurie het bevind dat Johnson & Johnson nie nalatig was in die bemarking en verkoop van die produk nie. Die saak is aanhangig gemaak deur die families van Mary Owens, Bonnie Tienken en Geneva Williams, wat almal oorlede is nadat hulle die talkprodukte oor jare gebruik het.

Die uitspraak is die jongste ontwikkeling in die langdurige regsstryd rondom die maatskappy se talkprodukte. Meer as 67 000 soortgelyke eise is reeds teen Johnson & Johnson ingestel deur mense wat beweer die produkte het kanker veroorsaak.

Volgens Reuters het sommige van die sake reeds tot miljarde rand se skadevergoedingsuitbetalings gelei, terwyl ander uitsprake die maatskappy van aanspreeklikheid vrygespreek het.

Babapoeier. FOTO: The New York Times