Kinders kry gespesialiseerde chirurgie in Bloemfontein

Vyf kinders tussen sewe en 12 jaar oud het onlangs gespesialiseerde herkonstruktiewe chirurgie by Life Rosepark-hospitaal in Bloemfontein ondergaan.

Nuus in Afrikaans berig die prosedures was deel van die Life for a Child: Because Every Child Deserves a Future-inisiatief, wat kinders toegang tot gespesialiseerde behandeling gee.

Die kinders het verskillende prosedures ondergaan, waaronder die herstel van ’n sagte verhemelte, die regstelling van aangebore afwykings aan albei ore en die vrystelling van handkontrakture.

Een kind het ’n weefselekspandeerder ontvang ter voorbereiding van die herkonstruksie van ’n oor, terwyl ’n ander kind se linkeroor, wat tydens ’n hondaanval beseer is, met ribkraakbeen herkonstrueer is.

Volgens die hospitaal kan die behandeling nie net ’n kind se funksionering en voorkoms verbeter nie, maar ook selfvertroue en algemene lewensgehalte bevorder.

FOTO: Instagram