Midde-Ooste: Trump beweer Iran het tot die voorwaardes ingestem

Saamgestel deur Ilde Roos
10 hours ago
1 min read

Amerika se president Donald Trump beweer dat Iran ingestem het tot voorwaardes wat dit lank teëgestaan het, insluitend om ambisies vir ’n kernwapen prys te gee en atoommateriaal oor te gee.

Trump is optimisties oor die vooruitsigte dat die VSA en Iran ’n permanente skietstilstand kan beklink, terwyl die twee partye ’n verlengde wapenstilstand bespreek voor dit volgende week verval.

MoneyWeb berig Trump het Donderdag aan verslaggewers buite die Withuis gesê dit lyk baie goed dat ’n ooreenkoms met Iran gemaak gaan word. Hy sê die ooreenkoms sal ook “gratis olie” en die heropening van die Straat van Hormuz insluit.

Teheran het nog nie in die openbaar bevestig dat dit dié toegewings gemaak het nie.

Onderhandelinge tussen Washington en Teheran kan volgens Trump hierdie naweek hervat word.

Terwyl Trump ’n vinnige oplossing verwag, glo sommige Golf-Arabiese en Europese leiers dat ’n ooreenkoms sowat ses maande kan neem, en dat die skietstilstand vir dié tydperk verleng moet word.