‘n Klein Vrystatertjie herstel goed nadat hy sy been verloor

Die vyfjarige Vrystatertjie Ernst Groenewald herstel goed in die Mediclinic Bloemfontein nadat hy sy regterbeen in 'n fratsongeluk op 'n plaas naby Hertzogville verloor het.

Nova News berig Ernst is ernstig beseer nadat hy in 'n plaaswerktuig beland het terwyl hy saam met sy pa op die plaas was.

Hy is deur paramedici behandel en daarna na Bloemfontein geneem waar hy 'n noodoperasie ondergaan het.

Dokters moes sy regterbeen amputeer en ook ernstige beserings aan sy linkerbeen behandel.

Ernst het Woensdag met spelterapie begin om hom te help om die trauma van die ongeluk te verwerk.

Volgens sy ouers maak hy goeie vordering en is sy pediater tevrede met sy herstel.

Sy pa, Christo Groenewald, sê dit gaan elke dag 'n bietjie beter met hom.

Ernst Groenewald. FOTO: Nova News