‘n Vrystaatse wildsveearts is deur ‘n buffel gegaffel

’n Bekende wildsveearts van Kroonstad, JW Eksteen, is in ʼn ernstige toestand nadat hy deur ʼn buffel aangeval is.

Volgens Maroela Media word hy tans onder sedasie in die intensiewesorgeenheid van die Mediclinic-hospitaal in Bloemfontein behandel.

Luidens ʼn Facebook-plasing het Eksteen glo ʼn hek van ʼn kamp met buffels probeer toemaak toe dit vasgehaak het.

Hy het geval en in die kamp beland, waarna ʼn buffelbul hom herhaaldelik gegaffel het.

Hy is later in ʼn plas bloed gevind en inderhaas na ʼn dokter in Clocolan geneem, voordat hy per helikopter Bloemfontein toe oorgeplaas is.

Eksteen se toestand is tans stabiel en daar is volgens kennisse geen rede tot kommer nie, hoewel hy steeds noukeurig gemonitor word.

JW Eksteen. FOTO: Maroela Media