Ontvoerde onderwyseres veilig tuis

’n Onderwyseres van Gqeberha is, nadat sy van ’n skool ontvoer is, veilig terug by haar familie. News24 berig ’n onderwyseres van Happydale Special School in Gqeberha, Sumaiya Ali, is Maandag deur drie mans in die skool se parkeerarea ontvoer. ’n Kollega het probeer om hulle te agtervolg, maar was onsuksesvol. Die Oos-Kaapse Departement van Onderwys se woordvoerder, Mali Mtima, het die onderwyseres se terugkeer bevestig, maar geen verdere besonderhede verskaf nie. Volgens die Valke se woordvoerder, kolonel Avele Fumba, was daar na haar verdwyning ’n losprysversoek gemaak, maar die bedrag mag nie meer bekend gemaak word nie. Dit is ook onduidelik of Ali se familie die losprys betaal het. Die skoolpersoneel sal glo beradingsondersteuning ontvang.