Ramokgopa wil die speelveld tussen Eskom en private kragopwekkers gelyk maak

Saamgestel deur Armando Pieters

Aug 30

1 min read

Minister van Elektrisiteit en Energie, Kgosientsho Ramokgopa, wil die speelveld tussen Eskom en private kragopwekkers gelyk maak.

Volgens ’n berig deur Maroela Media sê Ramokgopa Eskom moet beter toegerus word om in ’n meer mededingende elektrisiteitsmark teen private ondernemings mee te ding.

Ramokgopa het glo voorgestel dat Eskom van sekere beperkings ingevolge die Wet op Openbare Finansiële Bestuur, of PFMA, vrygestel word. Hy wil ook hê private kragprodusente moet aan dieselfde maatskaplike verpligtinge as Eskom onderwerp word.

Moneyweb berig dat Ramokgopa van mening is Eskom het tans nie dieselfde buigsaamheid as private spelers nie, en dat die staatsbeheerde kragverskaffer nie altyd vinnig genoeg kan reageer wanneer nuwe geleenthede ontstaan nie.

Ramokgopa sê hy sal ’n voorstel hieroor aan die Kabinet voorlê nadat hy met die minister van Finansies, Enoch Godongwana, daaroor gekonsulteer het.

Kritici waarsku egter dat sommige van die voorgestelde maatreëls moontlik wetlike uitdagings kan meebring.