Sewe moet in Bfn vir veediefstal hof toe

Saamgestel deur Ilde Roos
Apr 20
1 min read

'n Totaal van sewe verdagtes sal na verwagting in die Bloemfonteinse landdroshof verskyn op aanklagte van veediefstal.

Volgens 'n polisieverklaring het lede van die Bloemspruit Misdaadvoorkomingseenheid op ’n wenk van die gemeenskap gereageer oor gesteelde skape wat by ’n woonplek in Phomolong aangehou is. Lede het vinnig opgetree en moes weens swaar reën ’n afstand te voet aflê.

Met hul aankoms is twee mans in 'n voertuig ontdek en tydens verdere inspeksie is lewende skape agter in die voertuig ontdek. Die twee mans is in hegtenis geneem.

Daarna is nog skape in die sinkhuis op die perseel gevind, en nog twee verdagtes is ook in hegtenis geneem. Nog 'n voertuig het buite stilgehou, en nog twee verdagtes is vir die besit van gesteelde vee gearresteer.

Die laaste verdagte, wat die eienaar van die woning is, is gevind waar hy binne-in die diepvrieskas weggekruip het.

Altesaam 30 skape is teruggevind en aan die regmatige eienaar oorhandig.