Strenger belastingreëls wag vir die wat ‘n ekstra inkomste verdien

Suid-Afrikaners wat ekstra inkomste deur kantbedrywe verdien, kan binnekort strenger belastingreëls in die gesig staar. Die Tesourie het voorgestel dat die drempel vir sogenaamde verdagte bedrywe, soos dobbelary, kunsverkope, kripto-handel of die verhuring van persoonlike bates, verlaag word van die huidige R1.8 miljoen na  R673 000. Hierdie wysiging, wat deel vorm van die konsep-Wysigingswetsontwerp op Belastingwette, beteken dat meer belastingpligtiges nie verliese teen ander inkomste sal kan verreken nie. Deskundiges meen hoewel dit die belastingbasis beskerm, is die nuwe drempel moontlik te laag. Die voorstel tree Maart volgende jaar in werking.