Talle is in hegtenis ná onluste in Mangaung

Tot op hede is altesaam 142 verdagtes in hegtenis geneem ná voorvalle van openbare geweld, plundering en kwaadwillige beskadiging van eiendom in dele van Mangaung.

Dit kom ná kriminele aktiwiteite Maandag aangehits is deur stemopnames en digitale plakkate wat op sosialemediaplatforms versprei is, waarin daar opgeroep is tot ’n “totale afskakeling”.

Volgens 'n polisieverklaring is verskeie sake geopen, insluitend openbare geweld, besigheidsinbraak, besigheidsroof, besit van vermoedelik gesteelde goedere en kwaadwillige beskadiging van eiendom. Die polisie is besig met die verwerking van die gearresteerde persone, en die verdagtes sal na verwagting binnekort in die hof verskyn. Nog arrestasies word mettertyd verwag.

Rosestad-nuus het vroeër berig die munisipaliteit sê hoewel gemeenskappe regmatige kommer mag hê, regverdig dit nie geweld of die ontwrigting van skole en openbare dienste nie.

'n Skermgreep uit 'n video wat versprei word. SKERMGREEP: Veskaf