Twee Bfn gesondheidsorgsentrums vat hande teen geestesgesondheid en verslawing

Saamgestel deur Ilde Roos
May 8
1 min read

Die Aurora Addiction Recovery Centre en die Bloemcare Psigiatriese Hospitaal in Bloemfontein het 'n strategiese samewerking geloods om die behandeling van individue wat beide geestesgesondheids- en middelmisbruikuitdagings ervaar te versterk.

Volgens 'n verklaring erken die ooreenkoms die groeiende behoefte om geestesgesondheids- en middelgebruiksteurnisse nie as afsonderlike toestande te behandel nie, maar as toestande wat ’n gekoördineerde kliniese en terapeutiese benadering vereis. Deur hierdie samewerking sal die multidissiplinêre spanne by beide instellings nou saam werk om omvattende, pasiëntgesentreerde sorg te lewer.

Die Aurora Addiction Recovery Centre is die enigste binne-pasiënt-rehabilitasie-fasiliteit in die streek wat by die Departement van Maatskaplike Ontwikkeling geregistreer is om nie-akute mediese ontgifting vir middelgebruikers te verskaf. Hierdie gespesialiseerde diens sal die multidissiplinêre span by die Bloemcare Psigiatriese Hospitaal, wat by die Departement van Gesondheid geregistreer is, beduidend ondersteun en meer doeltreffende stabilisering en voortgesette behandeling van pasiënte met psigiatriese behoeftes moontlik maak.