Vrystaatse beskuldigde vra borgtog om sy kinders te gaan sien

Nadat twee vermeende rowers in hegtenis geneem is ná ‘n plaasaanval op ‘n egpaar buite Smithfield in die Vrystaat, het een man aansoek gedoen om borgtog sodat hy tyd by sy vier kinders kan spandeer voordat hy tronk toe gaan.

Die ander man wil na sy diabetiese ouma gaan omsien.

Volksblad berig die verdagtes staan tereg op aanklagte van huisroof met verswarende omstandighede, diefstal van ‘n motorvoertuig en die besit van vermoedelik gesteelde goedere. Die egpaar het ligte beserings opgedoen.

Die staat het borgtog vir die beskuldigdes teengestaan aangesien hul lewe in gevaar sal wees weens die gemeenskap se woede oor die aanval, en omdat die beskuldigdes geen buitengewone omstandighede vir borgtog kon bewys nie.