Vrystaatse polisielede kry lewenslange vonnis

Drie polisielede van die Vrystaat is tot lewenslange tronkstraf gevonnis nadat hulle ’n man in aanhouding vermoor het. TimesLIVE berig dat die Phuthaditjhaba-streekhof die drie beamptes skuldig bevind het aan die moord op Thabo Moses Mopeli in 2022. Hulle is ook elk tot 12 maande tronkstraf gevonnis op drie aanklagte van aanranding met die opset om ernstig te beseer. Die mans is verder ongeskik verklaar om vuurwapens te besit. Volgens die Nasionale Vervolgingsgesag is Mopeli met vuurwapens aangerand en het hy later in aanhouding beswyk. Twee ander slagoffers is ook aangerand. Die vervolgingsgesag sê die vonnis stuur ’n duidelike boodskap dat magsmisbruik nie geduld sal word nie.